|
E
Zir Dla Vciâza.
Da
Furlè e da Cisèna
dai paiis chi fa cadèna
torna, torna a e nost Frampula
chi con l'auto o pur la mula
cun e treno od e mutor,
i raghez chi fa l'amor
i cumpagna la su bela
un'amiga o la surela
sgnur, puret, doni e burdel
ch'im pe propri tot fradel
i s'adona a qué in sta piaza
par avdé zirer l'avciâza.
Tot
quent ienn a Gnaf d'Ruchétt
sota e cmand d'un umarlett,
e prepèra mei che pò
du o tri car, d'uv monta sò
di tip bof propri dadbon
che, par fer dla cunfusion
e par ridar e fer baldoria,
iè mo degn dpasé a la storia.
|
Qui
che propri i fa fracass,
ricevend in te mustazz
o in tla porta de tucul
ovi merzi e cuciarul,
l'è mo Terzo e pularol,
cl'à di fati e poc parol;
Albanela e Zop dla Lisa
che iimpegna la camisa
par putè cun de snsuez
fe tre sborgni almanc a e mes,
mes insem a e bel Tatina
cui piìs fè mo da babina,
a Nuzént cha fa la tromba
cun na vosa che rimbomba,
Meneligh e pu Bateli
quel che conta al vec scudeli,
quand i canta una rumanza
bsogna propri tnis la panza. Lo
i bala, i selta, i sona,
is immascra un pò a la bona,
cun la faza tota nigra
e du occ ch' im pè dna tigra,
|
iè
mo pez ad chi simiòn
quand chi bala in te ghibòn.
Sovra
un car tirè da bu,
chi camena a du par du,
u s'avanza maistosa
la gran Vecia bè furmosa
tota avstida da la festa
dundulend un po la testa:
zala,
brota, nech sdintêda,
la va a fer la pasigeda
circundeda da suldè
ad carton tot quent blindé,
cun davanti una bandèna
cla ti sona una marcèna.
Sota
un braz la ià la roca
carga ad lén o mei ad stopa
com al doni che una volta
al fileva dri la porta
mentar e sol l'andeva zò,
o in tla stala in tla su soia
l'armugheva un pò 'd strafoia.
|
Figaréna
e melaranzi
al culpes come dal lanzi
in tla faza ai mascaròn
chi fa selt com di cavròn
e is difend tirend nuciôli,
feva guasta dal tignoli,
de ziz crud e grand alven
chi t'insghez sit ciapa ben.
Ecco
sgunr la mascareda par la Vecia prepareda.
4
marzo 1937
Esopino
(Stefano Grilli)
|
